Blog

Монголын уул уурхайн салбарт олон талын оролцоот хөгжилд чиглэсэн шинэ шатны хамтын ажиллагаа эхэллээ. Монголын Уул Уурхайн Үндэсний Ассоциаци (МУУҮА) болон “Монголын тогтвортой хөгжил, нийгмийн хариуцлагын зөвлөл” ТББ (ТНЗ) хооронд хамтран ажиллах тухай Харилцан ойлголцлын санамж бичигт өнөөдөр гарын үсэг зурав.
Энэхүү санамж бичиг нь “Хариуцлагатай уул уурхайн сайн дурын кодекс” болон “Тогтвортой уул уурхайн төлөө стандарт”-ын хэрэгжилтэд талуудын оролцоог бий болгон, улмаар сайжруулах, орон нутгийн харилцааны тогтвортой механизмуудыг нутагшуулахад чиглэж байгаа юм.

Гарын үсэг зурах ёслолын үеэр МУУҮА-ийн Гүйцэтгэх захирал Г.Эрдэнэтуяа “Хариуцлагатай уул уурхай нь зөвхөн компанийн дотоод үйл ажиллагаа биш, орон нутагтай хэрхэн ойлголцож, хамтран хөгжиж байгаа эсэхээр хэмжигддэг. Тиймээс энэхүү хамтын ажиллагаа бидний хувьд чухал алхам” гэж онцолсон бол ТНЗ-ийн Удирдах зөвлөлийн дарга О.Батболд “Бид судалгаа, сургалт, зөвлөх үйлчилгээ, олон нийтэд мэдээлэл түгээх үйл ажиллагаагаар дамжуулан итгэлцлийг бий болгоход чиглэсэн бодит ажлуудыг хамтран хэрэгжүүлнэ” гэсэн юм.
Хамтын ажиллагааны хүрээнд Талууд:
•Орон нутгийн удирдлага, иргэдийн бүлэг, иргэний нийгэм, компаниудад зориулсан уулзалт, өдөрлөг, сургалт зохион байгуулах
•Туршлага, судалгаанд үндэслэн харилцааны стратегийн загвар боловсруулах
•Тодорхой аймаг, орон нутагт туршилтын төсөл хэрэгжүүлэх
•Сайн туршлагыг олон нийтэд хүргэх нөлөөллийн ажлуудыг хамтран хэрэгжүүлэхээр тохиролцсон байна.
Энэхүү хамтын ажиллагаагаар иргэдийн оролцоо, компани-орон нутгийн харилцааны тогтвортой байдлыг дэмжих, орон нутгийн хөгжилд эерэг хувь нэмэр оруулахыг зорьж байна.